Skip to content Skip to navigation

Montaxe en cartel

46 ANOS DE TEATRO

"UN HOTEL DE PRIMEIRA SOBRE O RÍO"

Xohana Torres deixounos nesta obra un abano de perfiles que nos permite cualificar o texto tanto como unha comedia, unha farsa, unha traxicomedia ou unha traxedia; ou un todo ao mesmo tempo. A autora pretende afondar no espectador sentimentos ou vivencias posiblemente próximas a cada quen, segundo vai sucedendo no decorrer do relato.

O texto está adaptado en CATRO CADROS por Doro Piñeiro, para Teatro ESCOITADE. Nel son constantes as referencias ás múltiples relacións persoais que nos atopamos acotío ao longo da vida, como tamén o son ás luces e sombras que debuxa a condición humana e que en moitas ocasións, tal condición, remata por saírse do que se considera a estabilidade emocional da persoa, do individuo. Tal así é a defensa "do noso, dos nosos e do máis próximo", a presión especulativa, a corrupción política, o desinterese social e a superstición que levamos no ADN, como xeito de saída a toda unha carencia cultural de sociedades xa caducas, e non tanto.

En definitiva Teatro ESCOITADE fai unha aposta nesta montaxe por un traballo dramático, exposto por cada actriz e por cada actor, que se aproxima, ao noso entender, aos retos que a autora nos deixou en cada acción, en cada escena e en cada cadro.

UN HOTEL DE PRIMEIRA SOBRE O RÍO é un relato, é unha historia de amor á natureza, é unha loa a impotencia e, finalmente, é un xeito de vida con data de caducidade.

Doro Piñeiro.


Centro Veciñal e Cultural de Valladares - Copyright © 2014